ကျွန်မချစ်တဲ့ သစ်တစ်ပင်

စမ်းရေစီးသံ တသွင်သွင်ကြားနေရသည်။

စမ်းချောင်းလေးတစ်ဖက်တစ်ချက်က ထင်းရှုးတောနဲ့ မေပယ်လ်ပင်တွေကြားထဲကို လေပြည်ခပ်တိုးတိုး တိုက်ခတ်သွားသံကိုလည်း ကြားလိုက်ရသည်။ လေပြည်ကြောင့် ရွက်နုလေးတွေနဲ့ ထင်းရှုးသီးပေါက်စလေးတွေ ကြွေကျသွားတော့ ရော်ဘင်ငှက်ကလေးက လန့်ပြီးပျံထွက်သွားသံကိုလဲ ကြားလိုက်ပြန်သည်။

ကန်စပ်မှာ ငန်းမိသားစုတစ်စု အစာရှာနေကြသည်။ နွေဦးရောက်ပြီဆိုတော့ ငန်းပေါက်လေးတွေ ပေါက်လာကြပြီလေ။ ဖခင်ငန်းကြီးကတော့ ဘယ်တော့မှ အစာဖြောင့်အောင် မစားနိုင်ရှာ။ ငန်းမလေးနဲ့ သူ့ကလေးတွေကို စိုးရိမ်စိတ်ဖြင့် လည်တံရှည်ကို ဟိုလှည့်ဒီလှည့်နှင့် ပတ်ဝန်းကျင်ကိုအမြဲစောင့်ကြည့်နေသည်။

ခပ်ဝေးဝေးမှာတော့ တိုက်တာအမြင့်ကြီးတွေ…။ Kodak, Creo, Electronic Arts, MDS ဆိုင်းပုဒ်တွေကို လှမ်းမြင်နေရသည်။ ခပ်လှမ်းလှမ်းဟိုင်းဝေးပေါ်မှာ ကားတွေ အရှိန်ပြင်းပြင်းသွားတဲ့ လေတိုးသံတွေ။ ဒီစမ်းချောင်းလေးထိပ်က ဒီသစ်ပင်ကြီးအောက်မှာ ကိုယ်လာလာထိုင်ရင်း.. အတ္တတွေကို တစ်စစီ ခြွေချနေမိတာကြာပေါ့။ သစ်ပင်ကြီးက စိမ်းလန်းသည်၊ မြင့်မားသည်၊ လှပသည်။ ပင်စည်ခြေရင်းမှာ စိမ်းစိုလန်းဆန်းတဲ့ မြက်ခင်းပြင်ရှိသည်။

ဒေါက်မြင့်ဖိနပ်ကို ချွတ်လိုက်ပြီး ဘေးနားသို့ အသာကန်ပစ်လိုက်ကာ စိတ်လွတ်လက်လွတ်ထိုင်ချလိုက်သည်။ သစ်ပင်ကြီးရဲ့ ပင်စည်ထဲမှာ ကျောကိုမှီကပ်ပြီးထိုင်လိုက်တော့ သူ့ထံကနွေးထွေးမှုတွေ။ ထိပ်ဖျားကိုမော့ကြည့်လိုက်တော့ သစ်ပင်ကြီးက ကိုယ့်ရဲ့ နေ့လည်စာထည့်တဲ့ အိတ်အစိမ်းနုလေးကို ခပ်တိုးတိုးပြုံးပြသည်။ ကိုယ့်အိတ်လေးထဲမှာ ပျင်းခြောက်ခြောက်နေ့လည်စာက ထုံးစံအတိုင်းပေါ့၊ ယိုးဂတ်ဗူးရယ်၊ အသားညှပ်မုန့်ရယ်၊ ပန်းသီးဖျော်ရည်ဗူးရယ်။ စပျစ်သီးခြောက်လေးတွေရယ်…

သစ်ပင်ကြီးကပြောသည်။ ထမင်းဖြူ၊ ကန်ဇွန်းရွက်ကြော်နဲ့ ငပိရည်တော့ အိမ်ရောက်မှစားပေါ့တဲ့။ ကိုယ်ခေါင်းငုံ့ပြုံးလိုက်ရင်း စပျစ်သီးခြောက်လေးအချို့ကို ငန်းလေးတွေဘက်ပြစ်ပေးလိုက်တယ်။ သစ်ပင်ကြီးကအလန့်တကြားထပ်ပြောသည်။
“မလုပ်နဲ့လေ..သူတို့ကိုသဘာဝအတိုင်းထားလိုက်၊ မင်းတို့လို အစာကြွေးသူတွေများလာရင် သူတို့ဘာသာ အစာမရှာတတ်ဘူးဖြစ်သွားလိမ့်မယ်၊ တစ်ခါတစ်ရံ အရာရာကို ပါးစပ်ထဲအထိ လိုက်ခွံ့ပေးခြင်းဟာ စေတနာမဟုတ်ဘဲ ဝေဒနာဖြစ်တတ်တယ်။ သူ့သဘာဝ အတိုင်းလေး ရှိပါစေ”တဲ့၊

ယိုးးဂတ်ဗူးကိုဖောက်လိုက်ပြီး ဇွန်းသေးသေးနဲ့ကော်စားနေတုန်း မြက်ခင်းပေါ်မှာ ပိုးကောင်လေးတစ်ကောင် ခပ်ဖြည်းဖြည်း ခရီးထွက်နေတာကိုမြင်လိုက်သည်။ စားနေတာကိုရပ်လိုက်ပြီး ပိုးကောင်လေးကို စိုက်ကြည့်ရင်း စိတ်ထဲက လှမ်းခေါ်လိုက်သည်။ တော်တော်ကြာကြာ စိုက်ကြည့်ရင်း ဒီဘက်ကိုလာပါလားလို့ လှမ်းခေါ်နေလိုက်သည်။

မမျှော်လင့်ဘဲ ပိုးကောင်လေးက အလျှားလိုက်သွားနေရင်းက ကိုးဆယ်ဒီဂရီလှည့်လိုက်ပြီး ကိုယ့်ဆီကိုတည့်တည့်မတ်မတ်ကြီး လျှောက်လာသည်။ ကိုယ့်ခြေဖမိုးနားရောက်လာတော့ ရပ်လိုက်သည်။ ပြီးတော့ ခေါင်းထိပ်က အတံလေးကို မြှောက်လိုက်ပြီး ကိုယ့်ကိုမော့ကြည့်နေသည်။

“မင်းကိုယ်မင်း စိတ်စွမ်းအင်ကောင်းတယ်ဆိုပြီး ပိုးကောင်လေးကို ခေါ်လို့သူရောက်လာတဲ့အခါကျတော့ မင်းဘာဆက်လုပ်မလဲ။ သူခရီးသွားနေတာနှောက်ယှက်သလို မဖြစ်သွားဘူးလား။ အခုမင်းက သူ့ရှေ့က အတားအဆီးဖြစ်နေပြီ၊ သူဆက်သွားလို့မရတော့ဘူးလေ”လို့ သစ်ပင်ကြီးကပြောတယ်။

ပိုးကောင်လေးကို တုတ်ချောင်းလေးနဲ့ အသာတို့ယူပြီး သူသွားနေတဲ့ လမ်းကြောင်းပေါ်ကို ကိုယ်ပြန်ချပေးလိုက်တယ်။

ဆံပင်တွေထဲကို လက်ထိုးသွင်းလိုက်ပြီး ခေါင်းကိုခါပစ်လိုက်သည်။ ပင်စည်ကြီးကို ကျောနဲ့ပိုဖိကပ်ထားပြီး ခြေကိုစင်း မျက်စိကိုမှိတ်ထားလိုက်သည်။ ပိုးကောင်လေးတွေရဲ့အော်သံ၊ ကျွတ်ဆတ်တဲ့လေညှင်းသံ၊ စမ်းရေခတ်သံ၊ သစ်ရွက်လှုပ်သံတွေကိုကြားနေရသည်။ လူရှင်းတဲ့တစ်နေ့က ကိုယ်ကိုယ်တိုင် တက်ချိတ်ပေးထားတဲ့ ဆည်းလည်းလေးရဲ့ တေးသံသာကိုလဲကြားနေရသည်။

“ရတဲ့အခိုက်အတန့်လေးမှာ အပြစ်မဲ့စွာ ပျော်နေလိုက်ပါ၊ မင်းပဲ ဒီကိုလာချင်လှချည်ရဲ့လို့ မိဘတွေကိုပူဆာခဲ့တယ်။ ဟိုဆယ်စုနှစ်လောက်ကလူတွေ လွယ်လွယ်နဲ့ မပြန်ဖြစ်ကြတာသိလို့ လေယာဉ်ကွင်းကိုလိုက်ပို့တဲ့ မင်းအဖေ ယောက်ျားကြီးတန်မဲ့ လေယာဉ်ကွင်းမှာ အံကြိတ်လို့ မျက်လုံးတွေ ရဲတွတ်နေခဲ့တယ်။ ဒီကိုရောက်ခါစက သတင်းစာပို့ရပို့ရ၊ နွားနို့ပို့ရပို့ရဆို။ နောက်တော့လည်း ဘွဲ့လေးတစ်ခု၊ အလုပ်ကောင်းလေးတစ်ခု၊ နောက်တော့ ကားလေးတစ်စင်း၊ အိမ်လေးတစ်ဆောင်၊ ဘယ်အရွယ်မှာ ဘာဖြစ်ရမယ်ဆိုတဲ့ ရည်မှန်းချက်တွေကို ဖြည့်ဆည်းနေရတာနဲ့ အချိန်တွေတိုက်စားနေတာ သတိတောင်မထားလိုက်မိဘူးမို့လား။ အခု စာရေးလို့ ပန်းစိုက်ပြီး လူသူနည်းတဲ့ မြို့လေးတစ်မြို့မှာ ဘ၀တစ်ခုကို အဆုံးသတ်ချင်တယ်ဖြစ်ပြန်ပြီလား။ မင်းတို့လူတွေက မရခင်တော့ လိုချင်လိုက်ကြတာ၊ ရသွားတော့လည်း ဘာမှမဟုတ်သလိုပါပဲလား”

“အခြေအနေတစ်ခုမှ တစ်ခုပြောင်းခြင်းဟာ ကောင်းကင်ဘားတန်းတစ်ခုမှ တစ်ခုကို လွှဲခုန်ခြင်းလိုပါပဲ။ ဘယ်သူမှ ဘားတန်းတစ်ခုထဲမှာပဲ တွဲလွဲအကြာကြီးခိုမနေကြဘူးလေ။ ရှေ့ကမြင်နေရတဲ့ ဘားတန်းကို ခုန်လွှဲပြီးရောက်အောင် သွားချင်ကြတာ။ ရှေ့ကဘားတန်းကို မထိခင် လေထဲက အခိုက်အတန့်ကတော့ ရင်ခုန်စရာကောင်းပါတယ်”

သစ်ပင်ကြီးကိုမော့ကြည့်ရင်း ခပ်တိုးတိုးငြင်းခုန်လိုက်သည်။

“တစ်ကယ်လို့ ပြုတ်ကျသွားခဲ့ရင်ရော” ပြောပြီး တစ်ချက်ရယ်မောလိုက်သည်။ သစ်ပင်ကြီး၏ ရယ်မောသံကို ကိုယ်အံ့သြသွားမိသည်။ မာနသံနှောသည့် တပ်မက်ဖွယ်ကောင်းသည့် ရယ်မောသံ။

“ဒါဆိုလည်း ထပ်ကြိုးစားကြည့်ရမှာပဲ၊ နာကျင်သွားခဲ့ရင်လည်း ဒီလူဟာပြုတ်ကျဖူးတဲ့သူ၊ နာကျင်ဖူးတဲ့သူပေါ့။ ဘားတန်းပေါ်က ပြုတ်ကျဖူးသူတွေ တော်တော်များကြမှာပါ”

“ဒီလိုပါပဲ ဘယ်လုပ်ရပ်မဆို တန်ပြန်သက်ရောက်မှုတွေ ရှိတယ်။ ဒီတန်ပြန်သက်ရောက်မှုရဲ့ အကျိုးအပြစ်တွေကိုလည်း ခံရဲရမှာပေါ့”

ခပ်လှမ်းလှမ်းက ခုံတန်းလေးပေါ်မှာ ရုံးတစ်ရုံးရုံးက စုံတွဲလေး ထမင်းအတူတူစားနေကြသည်။ သူတို့ထံက ရယ်မောသံတွေ တစ်ချက်တစ်ချက်ကြားလိုက်ရသည်။ ကိုယ်မရှိတဲ့အချိန်တွေမှာ သူတို့ ကိုယ့်သစ်ပင်အောက်မှာ ထိုင်တတ်ကြသည်တဲ့။ ဒီသစ်ရိပ်မှာ သစ်တောက်ငှက်လေးတွေ၊ ရော်ဘင်ငှက်လေးတွေ၊ ကျီးကန်းလေးတွေ နားခိုတတ်သည်။ အနီးအနားရုံးတွေက လူတွေလည်း သစ်ရိပ်ခိုကြသည်။ စမ်းချောင်းလေးတစ်လျှောက် သစ်ပင်ရိပ်တွေ ပေါများသော်လည်း ကိုယ်ကတော့ ဒီသစ်ရိပ်မှာပဲ ခိုလေ့ရှိသည်။ တစ်ခါတစ်ရံ ဒီအရိပ်အောက်မှာ လူရှိနေတတ်လျှင် ကိုယ်ခပ်လှမ်းလှမ်းက လှည့်ပြန်တတ်သည်။

“နောက်နေ့တွေလည်း… မင်း.. ပျင်းရင်လာခဲ့လေ။ ဒီမှာငါအမြဲရှိနေမှာပါ”

“ဟင်”

အားအင်ချိနဲ့စွာဖြင့် ပင်စည်ကိုမှီချလိုက်သည်။ ကျောပြင်နဲ့ ပိုကပ်ထားလိုက်ပြီး မျက်ရည်တွေစိုလာသည်။ နောက်..မျက်နှာချင်းဆိုင်အောင် ကိုယ်ကိုတပတ်လှည့်လိုက်ပြီး ပင်စည်ထဲမှာ ဖက်တွယ်မြုပ်ဝင်လို့ ရှိုက်ကြီးတငင်ငိုကြွေးလိုက်မိသည်။

“ပျင်းလို့လာတယ်…ဒီလိုထင်နေသလား။ ငါ့မှာလေ..မရှိတဲ့အချိန်တွေထဲက ရသမျှအချိန်လေးလုပြီး အေးမြတဲ့ အရိပ်မှာခဏလေးဖြစ်ဖြစ်ခိုိဝင်ချင်လို့ အဝေးကြီးကလာခဲ့တဲ့သူပါ။ ခါးသီးမှုတွေ၊ မောပန်းမှုတွေ၊ ကြေကွဲမှုတွေ၊ နာကျင်ခြင်းတွေနဲ့ မင်းဆီကို အရောက်လာခဲ့သူပါ။ မင်းအရိပ်မှာ ခိုနားနေသူရှိတဲ့နေ့ဆိုရင်လည်း လှည့်ပြန်တတ်သူပါ…”

“အချိန်ရှိတယ်…မရှိဘူးဆိုတာလည်း မင်းကိုယ်တိုင်သာ ဖန်တီးနေတာပဲမဟုတ်လား၊
နောက်ပြီး ငါက အရိပ်ပေးရမယ့်တာဝန်ရှိတယ်။ ဒီအရိပ်ဟာမင်းတစ်ယောက်တည်း အတွက်တော့ မဖြစ်နိုင်ဘူးလေ”

“နားလည်ပေးပါတယ်။ ဒီအရိပ်ကို တစ်ယောက်တည်း အတွက်တောင်းဆိုနေတာလည်း မဟုတ်ပါဘူး။ ဒါပေမယ့် မင်းဆီလာနေတာ.. မင်းနဲ့ရှိနေချင်တာ တစ်ခုတည်းသက်သက် ဆိုတာတော့ လက်ခံပေးပါနော်”

ပင်စည်ကြီးကို နှုတ်ခမ်းနဲ့ အသာလေးထိတို့ထားရင်း ခပ်တိုတိုး ရေရွတ်လိုက်မိတယ်… နှုတ်ခမ်းပေါ်မှာ ကြမ်းရှရှအထိအတွေ့တစ်ခု။ ဒီအတွေ့ကို ပျယ်ပြယ်မသွားစေ့ချင်မိတဲ့ စိတ်နှင့် ပင်စည်နဲ့ နှုတ်ခမ်းကို ဖိကပ်ထားလိုက်မိသည်။

“သွားတော့မယ်”

ခပ်တိုးတိုးပြောပြီး မတ်တပ်ရပ်လိုက်သည်။ လေအဝှေ့မှာ ပါးပါးလျှလျှအကျီင်္အဖြူက လွန့်လူးသွားသည်။ ဖိနပ်ထဲ ခြေထိုးစီးလိုက်သည်။ ထမင်းဗူးအိတ်လေးကို ကောက်ယူလိုက်သည်။ ခါးကိုဆန့်ပြီး ခြေတစ်လှမ်း လှမ်းလိုက်သည်။ သစ်ပင်ကြီးဘက်ကို တစ်ချက်ငေးကြည့်လိုက်သည်။ ပြီးတော့ လာရာလမ်းလေးအတိုင်း ပြန်ခဲ့ပါတော့သည်။