နေရစ်ခဲ့တော့ သရပါ...

ကျဉ်းမြောင်းသော၊ အကွေ့အကောက်များသော၊ လေပူတွေ တရကြမ်းတိုက်နေသော ကျောက်ပန်းတောင်းမြို့၏ ကားလမ်းဘေးက ထမင်းဆိုင်လေးတစ်ဆိုင်ထဲတွင် သူနှင့်သူမ အမှတ်မထင်ဆုံခဲ့သည်။ ဓနိမိုး၊ထရံကာ ထမင်းဆိုင်လေးထဲမှာ မှာထားသော
ထမင်းနှင့်ဟင်းကိုစောင့်ရင်း မဲညစ်ညစ် ရေနွေးကြမ်းအိုးထဲမှ ရေနွေးကို ရေဆာဆာနှင့် မော့သောက်လိုက်သော သူမကို ခပ်လှမ်းလှမ်းစားပွဲမှာ ထိုင်နေသောသူက ခပ်တည်တည်နှင့်ကြည့်နေခဲ့သည်။

ရှပ်အင်္ကျီ တစ်ပတ်နွမ်း၊ ကွက်စိပ်ပုဆိုးနှင့် သူ့အနားမှာ သူတို့အရွယ် လူငယ်တစ်စုဝိုင်းထိုင်နေသည်။ လွယ်အိတ်ကို စလွယ်သိုင်းထားသော ပိန်ပိန်ပါးပါး သူ၏ပုံပန်းက စိတ်ဝင်စားဖွယ်ကောင်းနေသည်။

“ဒါနဲ့ အစ်ကို.. မေရှင်ကိုရော သိလား”

သူ့ကို မေးလိုက်သည့်စကားကြောင့် သူမ အံ့သြသွားမိသည်။ သူတို့ဝိုင်းကို ဖျတ်ကနဲခေါင်းမော့ပြီး လှမ်းကြည့်လိုက်မိသည်။

“ဟာ.. ကောင်းကောင်းသိတာပေါ့ဗျာ”

သွက်လက်နေသည့်စကားသံက အနည်းငယ်တော့ ၀ဲနေသည်။

သူ၏ ဖြေသံကိုကြားတော့ သူမ သောက်လက်စ ရေနွေးတောင် သီးခမန်း ဖြစ်သွားသည်။

သူမဘေးက သူ့သူငယ်ချင်းကလည်း သူမကို မျက်ခုံးမြှင့်ပြသည်။ သူ့ကိုတော့ ထပ်မော့မကြည့်မိအောင် သူမကြိုးစားနေလိုက်သည်။

“အစ်ကို.. အစ်ကို့ကား အဆင်မပြေရင် အခုဒီကားနဲ့ပဲ ညောင်ဦးကိုလိုက်သွားလိုက်လေ”

“ဟုတ်တယ်… ကျွန်တော်တို့ စီစဉ်ပေးမယ်”

“အင်းပေါ့ဗျာ.. အခြေအနေအရ မီးစင်ကြည့်ကရမှာပဲ”

သူက အေးဆေးတည်ငြိမ်စွာပြောလိုက်သည်။

သူမ သူငယ်ချင်းက ပခုံးတွန့်ပြသည်။
သူမကတော့ မထိန်းနိုင်တော့ဘဲ ချောင်းတဟွတ်ဟွတ်ဆိုးပစ်လိုက်မိသည်။

ဒီလိုနဲ့ သူမတို့စီးလာတဲ့ အဝေးပြေးကားနဲ့ သူတို့အုပ်စုပါလာကြသည်။ လမ်းမှာသဲချောင်းလေးတွေ၊ ခြောက်သွေ့တဲ့ လွင်ပြင်တွေကို ငေးရင်း သူမ အိပ်ပျော်သွားခဲ့သည်။

နားထဲမှာ ဆူဆူညံညံအသံတွေကြောင့် သူမလန့်နိုးလာခဲ့သည်။
ညောင်ဦးမရောက်ခင် အမည်မသိ မြို့လေးတစ်မြို့မှာ ကားကရပ်ထားသည်။
ကားနောက်ပိုင်းမှ အသံများက ပိုကျယ်လောင်လာသည်။

“ခင်ဗျားတို့ ကျွန်တော့ကို နိုင်ငံခြားသားမှန်းသိရက်နဲ့ တင်ခေါ်လာတုန်းက ခေါ်လာပြီးတော့၊ အခုလို လမ်းတစ်ဝက်မှ ဆင်းခိုင်းတာတော့ ဘယ်ကောင်းမလဲဗျ”

“ဟုတ်ပါတယ်အစ်ကိုရယ်.. ခုနတုန်းကတော့ အစ်ကိုပဲသဘောတူခဲ့တာပဲလေ”

သူ့ဘေးမှ လူတစ်ယောက်က သူ့ဘက်မှ အသနားခံနေသည်။

“မဖြစ်ဘူးဗျ၊”

ကားမောင်းသူက အသံနှိမ့်ပြီး ပြောလိုက်သည်။

“မဖြစ်လို့မရဘူး။ ကျွန်တော့ကို ဒီလိုလမ်းမှ ချခဲ့လို့တော့၊ သက်ဆိုင်ရာကို တိုင်မယ်”

သူ အသံဝဲ၀ဲနှင့် မွတ်နေအောင်ပြောနေသည်။

“ကြည့်စီစဉ်ပေးလိုက်ပါအကိုရာ”

“အင်းလေ.. ကြည့်လုပ်ရမှာပဲ” ကားမောင်းသူ၏ အသံက ပိုလို့တိုးသွားသည်။

နောက်ဆုံးတော့ သူတို့အားလုံး အဆင်ပြေသွားကြသည်ထင်သည်။ ညောင်ဦးမြို့လေးကို ဆိုက်ရောက်လာခဲ့သည်။



ဧရာဝတီမြစ်ပြင်ကို ဖြတ်တိုက်လာတဲ့ နံနက်ခင်းလေပြည်က လတ်ဆတ်နေသည်။ မြက်ခင်းစိမ်းပေါ်က စားပွဲလေးမှာထိုင်ရင်း ငှက်ကလေးတွေ ခပ်တိုးတိုးသီချင်းဆိုနေသံကို သူမ နားစွင့်ရင်း မွှေးပျံ့တဲ့ လက်ဘက်ရည်ပူပူကို ပန်းကန်ထဲသို့ ငှဲ့လိုက်သည်။ သူမ သူငယ်ချင်းက လှပသွယ်လျတဲ့ လက်ကလေးတွေကို နံနက်ခင်းမှာ လိမ်းရတဲ့ လိုးရှင်းလိမ်းရင်း နံနက်စာကို တို့ကနန်းဆိတ်ကနန်းစားနေသည်။ ထမင်းဟင်း ကောင်းကောင်း မစားနိုင်တာရယ်၊ ခရီးပန်းတာရယ်ပေါင်းပြီး သူမ သူငယ်ချင်း၏ မျက်နှာ ချောင်ကျသွားတာကို သတိထားလိုက်မိသည်။ သူမကတော့ သေသေချာချာ ညကတည်းက ကြိုတင်မှာထားတဲ့ ပဲပြုတ်ထမင်းကြော်ကို မြိန်ရည်ရှက်ရည် စားနေခဲ့မိသည်။ သူငယ်ချင်းကို အားမနာနိုင်တော့။ ဒီပဲပြုတ်စင်စစ်ကို မစားရတာ နှစ်နဲ့ချီနေပြီလေ။ သူမတို့ဘေးက စားပွဲမှာ လူတစ်ယောက် ၀င်ထိုင်လိုက်သည်မို့ စောင်းငဲ့ကြည့်လိုက်သည်။ ဖြူဖွေးနေတဲ့ ရှပ်အဖြူရောင်၊ အပြာနုကွက်စိပ်ပုဆိုးနဲ့ သူက သူမတို့ကို ပြုံးပြလိုက်သည်။

“မင်္ဂလာပါ”

ဒီတစ်ခါတော့ သူမ ချောင်းမသီးတော့။

“မင်္ဂလာပါရှင့်”

အပြာနောက်ခံမှာ အစိမ်းရောင်လဲ့နေသော မျက်လုံးများကို ကြည့်ရင်း သူမနှုတ်ဆက်လိုက်သည်။
“မင်းဂလာပါရှမ်”

သူမ သူငယ်ချင်းကလဲ အသံဝဲ၀ဲလေးနဲ့ ပြန်နှုတ်ဆက်လိုက်သည်။

လွတ်နေတဲ့ ခုံပေါ်ကို ကျောပိုးအိတ်ကို သူတင်လိုက်သည်။ သူရဲ့ကျောပိုးအိတ်ပေါ်မှာ
အဖြူပေါ်မှာ အနီရဲရဲ သစ်ရွက်တံဆိပ်။

သူကလဲ ခုံပေါ်က သူမတို့ရဲ့ကျောပိုးအိတ်တွေပေါ်က အဖြူခံမှာ အနီရဲရဲသစ်ရွက်တံဆိပ်ကို လှမ်းကြည့်လိုက်သည်။ ပြီးတော့ တချက်ပြုံးလိုက်သည်။

“ဒါကြောင့် နယ်ခံတွေနဲ့မတူဘူးလို့ တွေးနေသေးတယ်”

“အစ်ကိုလည်း နယ်ခံနဲ့ မတူပါဘူး”

မရင်းနှီးသေးတဲ့ တစိမ်းတွေ ရင်းနှီးစွာ ရယ်မောလိုက်ကြသည်။

“ဒါနဲ့ ဘယ်ပြည်နယ်ကလဲ”

“ဘီစီကပါ”

“အော်.. ကျွန်တော်က အွန်တေရီယိုက၊ တိုရန်တို ယူနီကလေ၊ ပုဂံကို လေ့လာနေသူတစ်ယောက်ပါ”

“ကောင်းလိုက်တာ၊ နေရာချင်းလဲမလား”

သူမအပြောကြောင့် သူရယ်မောလိုက်သည်။

“မြန်မာလို မွတ်နေတာပဲ။ ရောက်တာဘယ်လောက်ကြာပြီလဲ၊ ဘယ်လိုသင်တာလဲဟင်”

သူမ သူငယ်ချင်းက အင်္ဂလိပ်လို လှမ်းမေးလိုက်သည်

“ရောက်တာသုံးနှစ်ရှိပြီလေ၊ လက်ဖက်ရည်ဆိုင် များများထိုင်တယ်။ အဲဒီလိုနဲ့ဗမာစကားတတ်တာ”

သူက ဗမာလိုပြန်ဖြေလိုက်သည်။

“ကနေဒါမှာ ဘာလုပ်နေတာလဲ၊ ကျောင်းလား၊ အလုပ်လား”

“ကျွန်မတို့က အဲဒီမှာ နေတာပါ” သူမအသံက တိုးတိမ်၊ ခြောက်ကပ်စွာထွက်လာသည်။

“ဩော်….. ”

ပုဂံသမိုင်းကို လေ့လာနေသော၊ ဗမာစကားကို ရေလည်အောင်ပြောနေသော၊ ပုဆိုးဝတ် လူဖြူတစ်ယောက်ရှေ့မှာ၊ သူမ အနေရခက်စွာခေါင်းငုံ့နေခဲ့မိသည်။

ထိုနေ့က နံနက်စာဝိုင်းမှာ သူနဲ့ သူမ သူငယ်ချင်းတို့ စကားတွေ ဖောင်ဖွဲ့နေခဲ့သည်။

သူမသူငယ်ချင်းက သိုးဆောင်းစကား များများသုံးပြီးပြောသည်။ သူကတော့ ဗမာလိုပဲ ပြောသည်။ သူမကတော့ နားထောင်သူ သက်သက်။



ဒီလိုနှင့် ကမ္ဘာရဲ့ ဟိုဘက်ခြမ်းမှာတုန်းက မဆုံဖြစ်ခဲ့ကြဘဲနှင့် ပုဂံမြို့လေးရဲ့ တည်းခိုခန်းတစ်ခုမှာ အတူတည်းခိုဖြစ်ကြသည့် သူတို့သုံးဦး ခင်မင်ရင်းနှီးသွားကြသည်။ သူအလုပ်အားသည့် နေ့များတွင် ခရီးတိုလေးတွေ အတူတကွ ထွက်ဖြစ်ခဲ့ကြသည်။ လွတ်လပ်မှုကို ခုံမင်နှစ်သက်တဲ့ သူမသူငယ်ချင်းက ကျောပိုးအိတ်တစ်လုံး၊ စက်ဘီးတစ်စီးနှင့် နံနက်စောစောကတည်းက ပျောက်သွားတတ်သည့်နေ့များ၊ အစားတွေနဲ့ မတည့်လို့ ဗိုက်ရစ်ပြီးနာတယ်ဆိုပြီး အခန်းထဲမှာ စာအုပ်တစ်အုပ်နှင့် ကျန်ရစ်ခဲ့တတ်သည့် နေ့များတွင်တော့ သူနှင့် သူမ နှစ်ဦးတည်း စက်ဘီးကိုယ်စီနှင့် စေတီပုထိုးတွေဆီ၊ ရွာလေးတွေဆီ၊ ခြေဦးတည့်ရာ ထွက်ဖြစ်ခဲ့ကြသည်။



ထိုနေ့က ဓမ္မယံကြီးဘက်ကို သူနှင့် သူမ ထွက်ဖြစ်ခဲ့ကြသည်။ ပူစပ်စပ်နေရောင်အောက်မှာ ထနောင်းနံ့က သင်းပျံ့နေသည်။ ခပ်ဝေးဝေးက ခပ်ဖြည်းဖြည်း ရွေ့နေတဲ့ ခင်တန်း၊ တာရိုးလေးတွေကို ငေးရင်း မြင်းလှည်းလေးပေါ်မှာ ဂနာမငြိမ်ဖြစ်နေတဲ့ သူမကို သူပြုံးကြည့်နေခဲ့သည်။

“အဆင်မပြေဘူးလား”

“လမ်းဆင်းလျှောက်ရင် ကောင်းမယ်ထင်တယ်”

“ဘာဖြစ်လို့လဲ”

“မြင်းလေးကိုကြည့်လေ။ သိပ်ပိန်တယ်။ မနည်းဆွဲနေရတယ် မစီးရက်ဘူး”

မြင်းလှည်းသမား မကြားအောင် သူမ အသံကို နှိမ့်ပြီး ခပ်တိုးတိုးပြောလိုက်သည်။

“ဒါဆို မြင်းလှည်းသမား ပိုက်ဆံမရရင်၊ သူ့မိသားစုတင်မက ဒီမြင်းလေးပါ ပိုငတ်မှာပေါ့”

ထိုအချိန်မှာ မြင်းလေးက ကိစ္စပြုလိုက်သည်။ ခံထားတဲ့ အကာက မလုံလို့ မညီညာတဲ့ လမ်းတွေပေါ်မှာ ကြဲပြန့်သွားသည်။ ဒါကို သူမ ခပ်ငေးငေးကြည့်နေမိသည်။

ဒီလိုနဲ့ အတိတ်ထဲမှာ အိပ်မောကျနေတဲ့ ပျက္ခရွေတောင်တန်း၊ အရိမဒ္ဒနပူရ၊ သဒ္ဒနီတိ၊ ဂမ္ဘီရပညာ၊ ဂန္ဓာရီအတတ် စသည်တို့ကို အတိတ်ထဲက ဆွဲခေါ်လာနေတဲ့ သူနဲ့၊ မြို့ပြရဲ့ ဖိစီးမှုတွေကနေ အဝေးကိုပြေးလာတဲ့ သူမတို့၊ ပုဂံမြို့ရဲ့ လမ်းလေးတွေပေါ်မှာ၊ ဖုတ်တထောင်းထောင်းထတဲ့ လေပူတွေကြားမှာ၊



သံတော်ကြားစေတီလေးနားက ပန်းရုံလေးနားမှာ၊



လေတွေတိုက်နေတဲ့ ဗူးဘုရား ရင်ပြင်ပေါ်မှာ၊



အရုဏ်ဦးရဲ့ ကြည်ပြာရောင် မြူတွေကြားမှာ၊ ရွှေရောင်လက်တဲ့ ဧရာဝတီရဲ့ လှိုင်းကြက်ခွပ်တွေကြားမှာ အတွေးတွေ၊ ခံယူချက်တွေ ဖလှယ်ဖြစ်ခဲ့ကြသည်။



ထိုညကတော့ လရောင်က ဖိတ်ဖိတ်တောက် သာနေတဲ့ည။ မြစ်ပြင်ထဲမှာ လှေကလေးတွေ ခပ်ဖြည်းဖြည်းလှော်ခတ်နေတဲ့၊ တောင်တန်းတွေ မှုန်ပြနေတဲ့၊ သစ်ရွက်တွေ အရောက်တောက်နေတဲ့၊ သင်းပျံ့တဲ့ ညလေတွေ လွန့်လူးနေတဲ့၊ ကဗျာဆရာရင်ထဲက ကဗျာတွေ ထွက်ကျလာနိုင်တဲ့ည။

တည်းခိုခန်း ပန်းခြံထဲက ခုံတန်းလေးမှာ သိပ်လှတဲ့ည အိပ်မရနိုင်လို့ သူမ မြစ်ပြင်ဘက်ကို ငုတ်တုပ်ထိုင်ငေးနေခဲ့တဲ့ည။ ညင်သာတဲ့ ခြေသံတစ်စုံက ခုံတန်းဘေးမှာ ရပ်တန့်သွားတဲ့ည။

ထိုင်ခွင့်ပြုလိုက်တဲ့ သူမဘေးမှာ သူ ၀င်ထိုင်ရင်း ထုံးစံအတိုင်း အတွေးတွေ ဖလှယ်နေခဲ့ကြသည့်ည။

“တကယ်တော့ ဒီဒေသမှာ လုပ်စရာတွေ အများကြီးရှိနေတယ်”

“ဘယ်လိုပဲ ဖြစ်ဖြစ် ကိုယ်လုပ်ချင်တယ်ဆို ဖြစ်ပါတယ်”

“ကျွန်တော်လား၊ ဒီနေရာမှာ တစ်နှစ်ကြာရင်လဲကြာမယ်။ နှစ်ပေါင်းများစွာ ကြာသွားရင်လဲ ကြာသွားမယ်”

“ဂရန့်ရနေသမျှ ဘန်ကောက်သွားပြီး ဗီဇာတင်တင်ပြီး ဒီပုဂံမှာ ဆက်နေရင် နေဖြစ်မယ်”

“ဒီလောက်လှတဲ့ လုပ်စရာတွေအများကြီးရှိတဲ့ တိုင်းပြည်မှာ ဘာလို့မနေတာလဲဟင်”

“ကျွန်တော်နဲ့……. ကျွန်တော်နဲ့… ဒီပုဂံမှာ အလုပ်အတူတူလုပ်ပါလား”

………..
………..

“ခင်ဗျား စိတ်ဝင်စားတဲ့ မြန်မာပြည်ကယောင်္ကျားအချို့ထက် ကျွန်တော်က မြန်မာပြည်အကြောင်း၊ ပုဂံအကြောင်း၊ မြန်မာ့အနုပညာတွေ ဂီတတွေအကြောင်း၊ သမိုင်း၊ပထ၀ီအကြောင်း ပိုသိနေတယ်ဆိုရင်ကော.. ဟင်းဟင်း.. ဒီမြို့မှာ နေမလား”

“ခင်ဗျားပြောတယ်မို့လား၊ ဗမာကိုယူမှ ခရေအကြောင်း၊ ငုဝါအကြောင်း၊ ချိုင့်ခွက်တွေပေါတဲ့ အနီရောင်လမ်းလေးတွေအကြောင်း ပြောလို့ရမှာဆိုတာ၊ တစ်ကယ်တော့ ခင်ဗျားပြောချင်တဲ့ မြန်မာ့စာပေ၊ဂီတ၊ နောက်ပြီး မြန်မာပြည်ရဲ့ ရာသီပန်းမျိုးစုံအကြောင်းလဲ ဒီကသာမန်လူတွေထက်တောင် ပိုသိပါတယ်။ အနီရောင်လမ်းတွေပေါ်မှာလဲ ပုဆိုးဝတ်ပြီး ကျွန်တော်လျှောက်တတ်ပါတယ်”

“မော်ဒန်လွန် ကဗျာတွေအကြောင်းပြောချင်တယ်ဆိုရင်တော့ ကျွန်တော်လေ့လာရဦးမှာပေါ့လေ”

အဲဒီညက လေတိုက်လို့ လွင့်သွားတဲ့ သူမနဖူးစပ်က ဆံနွယ်လေးကို သူက လက်နဲ့ သပ်တင်ပေးလိုက်တယ်။ သူမကို ငေးကြည့်နေတဲ့ သူ့မျက်ဝန်းတွေထဲမှာ မျှော်လင့်ခြင်းအရောင်တွေ။

သူမလဲ သူ့မျက်ဝန်းတွေထဲကို စိုက်ကြည့်နေခဲ့လိုက်သည်။ လရောင်အောက်က သူ့ရဲ့ အစိမ်းရောင်သန်းတဲ့ ကြည်ပြာရောင်မျက်လုံးကို သူမ ငေးကြည့်နေခဲ့လိုက်သည်။

“ရှင်..သိပ်လှပါတယ်။ ဆံပင်တွေ၊ မျက်လုံးတွေ၊ နှာတံတွေ၊ နဖူးပြင်တွေ။ ယောင်္ကျားပီသပါတယ်။ ဥာဏ်ပညာကြီးပါတယ်၊ လူတွေကို ကူညီချင်တဲ့ လူသားအကျိုးပြုစိတ်ဓတ်နဲ့လဲ ပြည့်ဝပါတယ်။ လူတွေချထားတဲ့ ဘာသာရေး၊ လူမျိုးရေး၊ စတဲ့ စည်းတွေနဲ့ ကိုယ့်ကိုကိုယ် ဘောင်မခတ်ထားပဲ ကျယ်ပြန့်တဲ့ စိတ်ထား၊ သိမ်မွေ့လှပတဲ့ စိတ်ထားနဲ့လဲ ပြည့်စုံပါတယ်။ ကျွန်မကို တစ်သက်လုံးပျော်အောင်ထားနိုင်မယ်ဆိုတာလဲ ယုံပါတယ်။ ဒါပေမယ့် ကျွန်မ ရှင့်ကို ဘယ်လိုမှ ခံစားလို့ မရဘူး။ ရင်ထဲမှာ ဘာမှ ခံစားလို့မရလို့ပါနော်၊ ကျွန်မကိုခွင့်လွှတ်ပါ။”

ထိုနေ့က ခုနှစ်စင်ကြယ် အမြီးထောင်ချိန်ရောက်ခါနီးအထိ သူတို့ စကားတွေပြောဖြစ်ခဲ့ကြသည်။ နောက်ရက်တွင်တော့ သူတို့ ရန်ကုန်ကို ပြန်လည်ထွက်ခွာခဲ့ကြသည်။ သူမနှင့် သူမသူငယ်ချင်းကတော့ ရန်ကုန်မှာ ဆက်နေဖြစ်ဦးမည်။ သူကတော့ ဘန်ကောက်ကို ဆက်လက်ထွက်ခွာမည်။ ဗီဇာတင်မည်။ ပြန်ဝင်မည်ဟုဆိုသည်။ နေချစ်ချစ်တောက်ပူနေတဲ့ အင်းစိန်က အဝေးပြေး ကားဂိတ်နားက စားသောက်ဆိုင်တစ်ခုထဲမှာ သူတို့ ခရီးတစ်ထောက်နားဖြစ်သည်။ သူက လိုင်းကားနဲ့ပဲ ရန်ကုန်မြို့ထဲကို ဆက်ထွက်မည်ပြောတုန်းက သူမ အနည်းငယ်စိတ်ပူသွားမိခဲ့သည်။ သူက စီးနေကျပါဟု ခပ်ပြုံးပြုံးပြောသည်။ သူသွားတော့မည်ဆိုတော့ ကားဂိတ်နားအထိ သူမ လိုက်ပို့ပေးမိသည်။ သူမသူငယ်ချင်းက အလိုက်တသိ ထမင်းဆိုင်ထဲမှာ နေရစ်ခဲ့သည်။ ကားဂိတ်ရောက်တော့ ပူပြင်းတဲ့ နေရောင်အောက်မှာ လေပူတွေက ထပ်ဆင့်တိုက်ခတ်နေသေးသည်။

“လူဆိုတာ ခံစားချက်နဲ့ အသက်ရှင်တယ်ဆိုတာ ကျွန်တော်သဘောပေါက်ပါတယ်။ ခင်ဗျားရဲ့ ဆုံးဖြတ်ချက်ကို ကျွန်တော်လေးစားရမှာပေါ့ဗျာ၊ ခက်တာက ကျွန်တော်ကလဲ ပုဂံမှာ ပျော်တဲ့သူဗျ”

“ကောသလမင်းအိပ်မက်ထဲကလိုပေါ့ရှင်။ ပြည့်နေတဲ့ ရေအိုးတွေကို ထပ်ဖြည့်နေသူက ကျွန်မပဲထားပါတော့။ ရှင်ကတော့ မပြည့်သေးတဲ့ ရေအိုးတွေကို ဆက်လက်ဖြည့်ဆည်းပေးနေတာလေ။ ကျွန်မဒီမှာနေရင်လည်း ကျွန်မဟာ ရေအိုးတွေထဲက နောက်ထပ်ရေအိုးတစ်လုံးပဲဖြစ်မှာမို့ ရေဖြည့်ခွင့် ရမယ်လို့ မထင်ဘူး။ ရှင်ဖြည့်ပေးနေတဲ့ ရေအိုးတွေကိုယ်စား ကျွန်မ ရှင့်ကို ကျေးဇူးတင်တယ်လို့ ရိုးသားစွာ ပြောခွင့်ပြုပါ”

သူ.. သူမကို စိုက်ကြည့်နေခဲ့သည်။

ခပ်လှမ်းလှမ်းမှာ လိုင်းကားတစ်စီးက ခပ်ဖြည်းဖြည်း မောင်းနှင်လာသည်။ ပုဆိုးကို သူပြင်ဝတ်လိုက်သည်။

“ကျွန်တော် ပုဂံမှာ ရှိနေမယ်”

စိမ်းပြာရောင်မျက်လုံးများနှင့် ရင်မဆိုင်ရဲ၍ သူမခေါင်းငုံ့ချလိုက်မိသည်။ ကားဆိုက်လာသည်။ ကားပေါ်ကို သွက်လက်ကျွမ်းကျင်စွာ ခုန်တက်လိုက်သည်။

တွဲလောင်းခိုစီးရင်း သူမ မြင်ကွင်းထဲမှ သူ.. ကားနှင့်အတူ တရွေ့ရွေ့ေ၀၀ါးမှုန်ရီ ကွယ်ပျောက်သွားပါတော့သည်။

(တစ်ထောင့်ကိုးရာကိုးဆယ်နှောင်းပိုင်းက ပုဂံရက်များသို့)